رساله إلى قراء النوايا بترجمات المظاهر

من طرف **العمدة عماد** الأحد أكتوبر 23, 2011 11:45 am

بالبدايه ودي اعطيكم نبذه بسيطه عن هالفئة ..

هم مجموعه من الظرفاء , يتواجدون في مجتمعنا بكثره ..

اهتماماتهم محصورة في تصنيف البشر لمجموعات ..

مسلم ,كافر

ابيض , اسود

ملتزم , فاسق

عاقل, مجنون

يعني ماعندهم وسط ..

ومثلهم المفضل في الحياه { قل لي ماتلبس اقل لك من انت }

لايرون الحياه الا بلونين .. وعيونهم مسلطه لتفقد عيوب وهفوات الغير

ويعتقدون دائماً انهم كاملين والكامل وجه الله ..

هالنوع من البشر .. يكونون انطباعهم الأولي عنك بعد اول مشاهدة

لمظهرك الخارجي .. ويظل هذا الانطباع راسخ مدى الحياه

يعني يحكمون عليك بالسجن المؤبد داخل زنزانه مظلمه في

عقولهم المقفله باحكام

يعني لو قدر الله عليك وشافوك اول مرة بعباية كتف أو فستان قصير ,

طحتي من عينهم طيحتن قشرا , ماتقومين منها

حتى لو كنت تصلين احسن منهم وتتصدقين اكثر منهم

(طبعاً لحد يقول انك جالسه تحللين اللبس القصير ولا عبايه الكتف

, أنا لاأحلل ولاأحرم لأني لست مفتيه ! لكن هو مجرد مثال لاأقل ولا

أكثر )

,,

العلاقات الأجتماعية من وجهه نظري لابد يكون فيها مرونة

التشدد في كل امورنا يزيد الحياه تعقيد , ويزيد من تنافر

البشر .. كل انسان مهما كان لابد من وجود بعض الايجابيات

فية .. حتى لو كانت قليلة لكن لايخلو منها .. لية نحصر حكمنا

على الأخر بلبسة او مظهره الخارجي او عاداته الاجتماعيه

واللي ساعات يكون ماله ذنب فيها ..

لية نحرم نفسنا من متعه التعرف على الاشخاص المختلفين عنا ؟؟

من عطانا الحق بتصنيف الآخرين ؟؟ أنا شخصياً مايهمني وش دين الشخص ولا وش

لابس ولا وش عرقه , يهمني وش خلف هالأنسان من ايجابيات وسلبيات في شخصيته

يهمني وش بستفيد منه وايش بفيده , ولي علاقات رائعه مع اشخاص لايتوافقون مع مظهري

اطلاقاً , لا لبسهم ممكن البسه .. ولا حياتهم ممكن اعيشها .. لكن مامنعني هالشي

من العثور على مميزات فيهم .. يهمني شخصيه الأنسان ونضج تفكيرة ..

ويهمني ان الجلوس معه راح يضيف لي من اضافات معنويه , كل انسان عنده شي يقدمه ,

حتى الناس السيئين اللي عرفتهم في حياتي استفدت منهم ..

لأني تعلمت منهم كيف اتعرف على الخبيث من الطيب , وكيف اقرا افكارهم واساليبهم

وبالتالي كيف اتجنبهم .. لكن اكره مالي هو مصادرة حريه الغير .. والتدخل في مسارها

بطريقه او بأخرى .. او الأعراض عن شخص لمظهرة ..

لو اعرضتي عنه لمجرد ان لبسه ماوافق كتالوج تفكيرك الفذ,

وصادرتي حقه في التمتع بحريته , هل بتكونين نجحتي في تغيير

توجهه اللي تشوفينه سلبي ؟؟

بالعكس !! أنتي بنفورك منه راح تنفرينه من اسلوب الحياه

اللي تمثلينه ..

خل اضرب لكم مثال --}

بعض الأشخاص من قراء النوايا , لو شافت شخص اجنبي , يدين

بدين مختلف عن ديننا , يجفلون منه وكأن قارصتهم حيه

طبعاً .. لايخلو الأمر من تكشيرة عنيفه وصدة بزاويه 90 درجه

طيب هالشخص الغير مسلم .. وش بيكون تفكيرة عننا ؟؟

مادام انتي وأمثالك عينتوا نفسكم سفراء للأسلام !!

للأسف أن كثير من الغير مسلمين في بلاد أوربية كثيرة

يتمتعون بخصال اسلاميه اكثر من المسلمين انفسهم ..

ماشاهدته بأم عيني في بعض المدن الأوربية اخجلني والله

لما اطلع الصباح وكل اللي امر عليهم يلقون تحيه الصباح علي

مصحوبه بابتسامه لطيفه , بالرغم انهم ملاحظين الحجاب

وعارفين اني مختلفه عنهم ..

ياترى كم خصله اسلاميه سووها ؟؟

الأبتسامه صدقه , وافشاء السلام فضيله اسلاميه

كم شخص تلاقينة عندنا بالشارع ولا بمكان عام يبتسم بوجهك

ولا يفشي السلام ولا يصبح عليك ؟؟

( عاد الصبح حدث ولا حرج .. الكل طالع من بيته ونفسه بطرف خشمه

ولو تمر من قدامه لعن والديك ..)

خلونا واقعيين ... يمكن تشوفونها مبالغه .. لكن للأسف هي تعريه

لواقع مجتمع نعيش فيه .. او مضطرين نعيش فيه ..

حتى افراد العائله نفسهم قليل مايتعاملون مع بعضهم بخلق الاسلام

اعرف عائله كل اسبوع لازم يجتمعون ..

ولو احد يتخلف عن الاجتماع مصيبه .. شوي ويقيمون عليه الحد

والسبب من وجهه نظرهم انهم يطبقون صله الرحم ..

لكن تعالي شوفي وش يصير بالاجتماع ..

كل 2 او 3 مجتمعين يودودون في آذاني بعض .. ويحشون في

اللي قدامهم .. يعني يجتمعون عشان يحققون هدف اسلامي سامي

ويطلعون من اجتماعهم وهم محققين 50 بلنتي و20 ضربه جزاء

لما تكون نواياكم صافيه .. انشغلوا بقراءه نوايا الغير

,,

هالموضوع من جد رافع ضغطي ..

لاتقولون وش حارق رزك .. ولا طنش تعش !!

ترى هالمثل أكرهه من صميم قلبي .. لأنة مثل سلبي واللي يطبقه

سلبي .. كل شي بالمجتمع ينعكس عليك وعلى حياتك

وحياة اجيالك ..

كل انسان من حقه التعبير عن نفسه بالطريقه اللي يرتاح لها

وكل انسان من حقه يمارس حريته في مظهره ..

بدون مايشيل هم فلان وش بيقول ولا علان وش بيفكر

المظهر الخارجي ماله دخل بروح وجوهر الأنسان ..

مو بالضرورة ان وحدة لابسة فستان قصير او عباة كتف او كاشفه

وجهها تكون فاسقه او تدعوا للرذيله ..

وفي نفس الوقت مو كل وحدة لابسه عباه راس وقفازات

وشيلة طويله وثقيله يكون قلبها نظيف وروحها حلوة

اعرف نماذج تشيب الراس منهم .. من برا تقولين وش هالملتزمه

ماشاء الله عليها .. ولين جلست معك الا نفسيتها مريضه وحقودة

ومن تجلس وهي تحش بالناس ..

عمر المظهر واللبس ماكان سبيل للحكم على الآخرين

,,

مرة كان عندي موعد في احد المستشفيات .. وفي صاله

الانتظار كانت جالسه وحده قدامي .. متحجبه بس كاشفه وجهها

وكانت ماسكه كتيب حق المستشفى قدام وجهها وجالسه تقرا

وطولت على هالحاله .. انا بيني وبينكم لفتت نظري

مو عشانها كاشفه .. لأن هذي حريه شخصيه مالي دخل فيها

لكن لأن الكتيب كله على بعض صفحتين .. وش هالوقت اللي

استغرقته بقراءته ...

المهم .. انا نادوني وقمت سويت تحليل ورجعت للغرفه انتظر

النتيجه .. ويوم رجعت الا مكاني جلست فية وحدة وفية كرسي

فاضي جنب هاللي تقرا .. وكانت مازالت تقرا ..

يوم جلست .. والا وش اشوف !!

كانت حاطة مصحف داخل الكتيب .. وصارت طول هالوقت

تقرا قرآن .. ومخبيته عشان محد يعرف انها تقرا قرآن

عشان مايحسب عليها رياء ..

شفتوا كيف ؟؟ لو وحدة من هالظرفاء كانت مكاني كان

من يوم شافتها كاشفه كشرت بوجهها وجلست تستغفر

لكن ماردها كشفها عن انها تمارس عبادتها في مكان عام

ماتتخيلون كيف حسيت بخجل منها .. وانها كيف استثمرت

وقت انتظارها افضل مني ..

ومثل معاكس ..

مرة في احد الاجتماعات .. كانو ثنتين من اللي مظهرهم الخارجي

ملتزم .. تنانير طويله وبلايز ساتره , جالسين يسولفون جنبي

ودخلت وحدة للمجلس وقمنا كلنا نسلم عليها ..

يوم وصلتهم .. تعالوا شوفو الحفاوة .. وشلونك ووشلون عيالك

ووشلون امك وش اخباركم عساكم بخير وحياك الله الخ

هلو الديباجه الترحيبية السعوديه كلها ..

ومامداها تبعد عنهم الا التفت وحدة على الثانية وقامت تهمس

وهي تضحك ( وراها مخلقنه اليوم ؟ ) !!!!!!!!!!!!!!!!!!

يعني يوم انكم لابسين ساتر .. ورى ماسترتو السنتكم بعد ؟؟

غيبة + استهزاء + نفاق ..

هل مظهرهم الخارجي عكس على روحهم ؟؟

والأمثله كثير ويطول سردها ..

لكن خلاصة الموضوع .. دعوا الخلق للخالق .. هو اعلم بنواياهم منكم

.. ومو ضروري كل وحدة تمشي وهي معلقة على رقبتها سبورة

فيها جدول العبادات اللي تسويها عشان تغضون البصر عنها

.. الحياه قصيرة .. استثمروها بما يفيدكم .. واتركوا عنكم

الناس وش لابسين ولا وين رايحين ..

واذا مااسعفتكم مجاهركم بقراءة أرواح الآخرين .. فأغلقوها

عن قراءة مظاهرهم .