صارحته بالحب بعدين كرهته

المشكلة في قلبي اللي معذبني نفسي افصله عني مش عارفة ومش قادرة اقوى عليه ذي ما كنت بعمل ديما
انا بنت عندي 23 سنة
طول حياتي محبتش غير انسان واحد .. قلبي مخترش غيره رغم ان فيه كتير حبوني واتمنوا اني ابادلهم نفس الحب.. مش عارفة دا انتقام من ربنا ولا عشان اتبترت ذي ما بيقولوا .. لما جيت احب حبيت واحد هو كان واهمني انه بيحبني من طريقته واحترامه الشديد ليا وللأسف انا كنت بعامله وحش وكنت بحاول افهمه بطريقة غير مباشرة ان اللي بيحبني هيجيني لغاية البيت يطلب ايدي من اهلي وساعتها انا اللي اختار .. واستنيت واستنيت سنين وسنين.. لغاية ما تعبت بجد.. ولقتني غصب عني بصارحه بمشاعري.. أنا مش عارفة ازاي عملت كدا.. بس انا تعبت بجد وكان لازم اعرف راسي من رجلي .. كان لازم ارسى وارتاح
عرفت انه مش بيفكر فيا.. وانه بيعاملني معاملة خاصة لاني ليا عنده معزة خاصة غير كل الناس وانه عنده كلام كتير مستني الوقت المناسب اللي يقولهولي فيه
مبقتش عارفة هو عايز يعلقني بيه ولا ايه.. قلتله انا مش عايزة اتعلق بيك .. مش عايزة اتعلق بوهم وطلبت منه انه طالما مش هيحبني يبعدني عنه وبعدها لقيته بيعاملني معاملة وحشة جدا ويقفل السكة في وشي لما اكلمه فهمت انه مش هيحبني .. ولما سألته ايه الكلام اللي كنت مستني الوقت المناسب تقولهولي قالي انا مقلتش حاجة ذي دي اصلا ومش فاكر اني قلتلك كدا يعني نكر كلامه
انا اتأكدت انه مش بيحبني من طريقته معايا.. حتى احترامه ليا حاسة انه ميقاش موجود .. بصته ليا بحس انها بصة بقرف.. أنا فعلا حاسة اني كرهته وقولتهاله انا كرهتك كان رده عليا احسن!!!!!!!
مش عارفة هو ليه بيعمل معايا كدا.. انا خلاص كرهته ومش عايزاه بس نفسي يحترمني ذي ما كان بيحترمني .. ولا عشان صارحته بمشاعري.. ولا هو قاصد يزلني ذي ما كنت بعامله وحش في الاول .. ولا حد يقولي ايه
انا غلطانة اني صارحته ويارتني ما صارحته.. اللي بيوجعني دلوقتي مش انه محبنيش قد ما هو مبقاش يحترمني.. ودا خلاني اكرهه.. بكرهه بجد وبكره نفسي وزهقت من الدنيا انا مستهلش منه كدا والله العظيم قولولي اعمل ايه عشان يرجع يحترمني تاني